ಯಕ್ಷಗಾನ ತ್ರೀವೇಣಿ ಸಂಗಮ: ಪೇಜಾವರ ಶ್ರೀ
ಲೇಖಕರು : ವಿಜಯ ಕರ್ನಾಟಕ
ಭಾನುವಾರ, ನವ೦ಬರ್ 8 , 2015
|
|
ನವ೦ಬರ್ 8, 2015
|
ಯಕ್ಷಗಾನ ತ್ರೀವೇಣಿ ಸಂಗಮ: ಪೇಜಾವರ ಶ್ರೀ
ಸುಳ್ಯ :
ಯಕ್ಷಗಾನ ತ್ರೀವೇಣಿ ಸಂಗಮ. ಈ ಕಾರ್ಯಕ್ರಮ ಯಕ್ಷಗಾನ ಕಲಾವಿದರ ಸಮ್ಮಿಲನ. ಯಕ್ಷಗಾನ ಕರಾವಳಿ ಮಣ್ಣಿನ ಕಲೆ. ಇದು ಶಿಸ್ತಿನ ಕಲೆ. ಕಲೆ ಮತ್ತು ಭಾಷೆಯನ್ನು ಇಂದಿನ ಜನಾಂಗ ಪ್ರೀತಿಸಬೇಕು. ಯಕ್ಷಗಾನದಂತಹ ಶ್ರೀಮಂತ ಕಲೆಗೆ ವಿಶೇಷ ಮಾನ್ಯತೆ ನೀಡಬೇಕು. ಅಂದು ಶ್ರೀಕೃಷ್ಣ ಗೋವರ್ಧನ ಬೆಟ್ಟವನ್ನು ಎತ್ತಿ ಹಿಡಿದಿದ್ದಾನೆ. ಇಂದು ಕಲಾ ಪೋಷಕರು ಯಕ್ಷಗಾನ ಕಲೆಯನ್ನು ಎತ್ತಿ ಹಿಡಿದಿದ್ದಾರೆ ಎಂದು ಪೇಜಾವರ ಮಠದ ಶ್ರೀ ವಿಶ್ವೇಶತೀರ್ಥ ಸ್ವಾಮೀಜಿ ಹೇಳಿದರು.
ಸುಳ್ಯ ಸಂಪಾಜೆಯ ಡಾ. ಕೀಲಾರು ಗೋಪಾಲಕೃಷ್ಣಯ್ಯ ಪ್ರತಿಷ್ಠಾನದ ಆಶ್ರಯದಲ್ಲಿ ನಡೆಯುತ್ತಿರುವ ಸಂಪಾಜೆ ಯಕ್ಷೋತ್ಸವದ ರಜತ ಸಂಭ್ರಮದ ಪ್ರಯುಕ್ತ ಶನಿವಾರ ನಡೆದ ಸಭಾ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ ಮಾತನಾಡಿದರು.
ಎಡನೀರು ಮಠದ ಕೇಶವಾನಂದ ಭಾರತೀ ಸ್ವಾಮೀಜಿ ಆಶೀರ್ವಚನ ನೀಡಿದರು. ಸುಬ್ರಹ್ಮಣ್ಯ ಮಠದ ವಿದ್ಯಾಪ್ರಸನ್ನತೀರ್ಥ ಸ್ವಾಮೀಜಿ ಆಶಿರ್ವಚನ ನೀಡಿ, ಕರಾವಳಿಯ ಯಕ್ಷಗಾನ ಕಲೆ ಇಂದು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಬೆಳೆಯಬೇಕಾದರೆ ಕಲಾ ಪೋಷಕರೇ ಕಾರಣ ಎಂದರು.
ಪರಕ್ಕಜೆ ಗಣಪತಿ ಭಟ್ಟರ ಅಭಿನಂದನಾ ಗ್ರಂಥ, ಯಕ್ಷಗಾನದ ಸವ್ಯಸಾಚಿ ಕೆ. ಗೋವಿಂದ ಭಟ್ಟರ ಅಭಿನಂದನಾ ಗ್ರಂಥ, ವಿದ್ವಾನ್ ಹಿರಣ್ಯ ವೆಂಕಟೇಶ್ವರ ಭಟ್ಟ ವಿರಚಿತ ಋಷಿ ಪರಂಪರೆ ಗ್ರಂಥ ಮತ್ತು ರವಿಶಂಕರ ವಳಕುಂಜ ವಿರಚಿತ ಯಕ್ಷಪಾತ್ರ ದೀಪಿಕಾ ಪುಸ್ತಕ ಬಿಡುಗಡೆಗೊಳಿಸಲಾಯಿತು.
ವೇಮೂ ಹಿರಣ್ಯ ವೆಂಕಟೇಶ ಭಟ್ ಸ್ವಾಗತಿಸಿದರು. ವಾಸುದೇವ ರಂಗಾ ಭಟ್ ಕಾರ್ಯಕ್ರಮ ನಿರೂಪಿಸಿದರು. ಸರವು ರಾಮ ಭಟ್, ಯಕ್ಷಗಾನ ಕಲಾವಿದ ಕೆ. ಗೋವಿಂದ ಭಟ್, ಕಲಾ ಪೋಷಕ ಟಿ. ಶ್ಯಾಮ್ ಭಟ್, ಕೀಲಾರು ಪ್ರತಿಷ್ಠಾನದ ಉಪಾಧ್ಯಕ್ಷ ಕೀಲಾರು ರಾಜಾರಾಮ, ಕಾರ್ಯದರ್ಶಿ ಸುಮನಾ ಶ್ಯಾಂ ಭಟ್, ಪರಕಜೆ ಗಣಪತಿ ಭಟ್ ಉಪಸ್ಥಿತರಿದ್ದರು. ಬಳಿಕ ಸಂಪಾಜೆಯ ಕಲ್ಲುಗುಂಡಿ ಶಾಲಾ ವಠಾರದಲ್ಲಿ ಮೂರು ರಂಗಸ್ಥಳಗಳಲ್ಲಿ ಏಕಕಾಲಕ್ಕೆ ಶ್ರೀದೇವಿ ಮಹಾತ್ಮೆ ಸ್ಪರ್ಧೆಯ ಮೂರಾಟ ಪ್ರದರ್ಶನ ನಡೆಯಿತು.
ಯಕ್ಷಗಾನ ಪ್ರದರ್ಶನದಲ್ಲಿ 12 ಮಂದಿ ಭಾಗವತರು, 12 ಮಂದಿ ಮದ್ದಳೆಗಾರರು, 12 ಮಂದಿ ಚೆಂಡೆ ವಾದಕರು, 9 ಮಂದಿ ಚಕ್ರತಾಳದಲ್ಲಿ ಸಹಕರಿಸಿದರು. ಮೂರು ತಂಡಗಳಲ್ಲಿ ಹಿರಿಯ, ಕಿರಿಯ ಸಹಿತ ಒಟ್ಟು 100 ಮಂದಿ ಕಲಾವಿದರು ಪ್ರಸಂಗ ಪ್ರದರ್ಶಿಸಿದರು.
ಕೃಪೆ :
vijaykarnataka
|
|
|
